Талап арыз төрелікке

«Атамекен» ҚР ҰКП Төрелік орталығындағы төрелік талқылау талап арыз беруден басталады. Төменде — Регламенттің талап арызды беру мен оның мазмұнына қойылатын талаптары, сондай-ақ жеке-дара төреші мен алқалы құрамға арналған арыз үлгілері.

12-бап. Талап арыз беру

Дауды шешу үшін Төрелік орталыққа беру төрелік талқылауды қозғағысы келетін тараптың (бұдан әрі – талапкер) жазбаша талап арыз беруі арқылы (оның ішінде электрондық цифрлық қолтаңбамен куәландырылған электрондық нысанда) жүзеге асырылады.

13-бап. Талап арыздың мазмұны

1. Талап арызда:

1) талап арыз берілген күн;

2) талапкердің атауы, оның пошталық және электрондық мекенжайлары, банктік деректемелері, телефон нөмірлері;

3) жауапкердің атауы, оның пошталық мекенжайы мен банктік деректемелері, сондай-ақ егер бұл деректер талапкерге белгілі болса, телефон нөмірлері мен электрондық пошта мекенжайлары;

4) Төрелік орталыққа жүгінудің негіздемесі;

5) талапкердің талаптары;

6) әрбір талап сомасының есебі;

7) талапкер өз талаптарын негіздейтін мән-жайлар;

8) талап қоюдың негіздерін растайтын дәлелдемелер;

9) талап қою бағасы;

10) төрелік құрамның сандық құрамы туралы ұсыныс, сондай-ақ талапкер таңдаған төрешінің аты-жөні не төрешіні Төрелік орталықтың басшысы тағайындауы туралы өтініш;

11) төрелік талқылауды өткізу орнына, қолданылатын құқыққа және талқылау тіліне қатысты ұсыныстар;

12) талап арызға қоса берілетін құжаттар мен өзге де материалдардың тізбесі көрсетілуге тиіс.

2. Талап арызға:

1) жауапкерлердің, төрешілердің санына сәйкес және Төрелік орталық үшін талап арыздың көшірмелері;

2) төрелік және тіркеу алымдарының төленгенін растайтын құжаттар;

3) талапкер өз талаптарын негіздейтін мән-жайларды растайтын құжаттар, осы құжаттардың жауапкерлерге, төрешілерге және Төрелік орталыққа арналған көшірмелері;

4) электрондық форматтағы (Word және PDF) талап арыз және оған қоса берілетін құжаттардың PDF форматындағы скан-көшірмелері қоса беріледі.

Талапкер өз талап арызына іске қатысты деп санайтын өзге де құжаттарды қоса бере алады немесе кейін ұсынатын құжаттарға не басқа да дәлелдемелерге сілтеме жасай алады.

3. Талап арызға талапкер немесе талап арызға қол қоюға және беруге өкілеттігі болған жағдайда оның өкілі қол қоюға тиіс. Егер талап арызға талапкердің өкілі қол қойса, талап арызға сенімхаттың түпнұсқасы (нотариат куәландырған көшірмесі) немесе өкілдің өкілеттігін куәландыратын өзге де құжат қоса берілуге тиіс.

4. Талап арыз және оған қоса берілетін құжаттар қазақ немесе орыс тілінде ұсынылуға тиіс. Талап арыз өзге тілдерде ұсынылған жағдайда, талапкер көрсетілген құжаттардың қазақ немесе орыс тіліне нотариат куәландырған аудармасын қамтамасыз етеді.

12 және 13-баптар Төрелік орталық Регламентінің қолданыстағы редакциясы бойынша келтірілген.

Талап арыз үлгілері

Орталық DOCX форматындағы талап арыздың екі үлгісін ұсынады — дауды жеке-дара төреші қарауы үшін және үш төрешіден тұратын алқалы құрам қарауы үшін. Үлгіні «Құжаттар» бетінен алуға болады: файлды жүктеп алыңыз немесе оны хатшылықтан сұраңыз — сұрау нысаны бір басумен ашылады.

Талап қоймас бұрын төрелік және тіркеу алымдарын есептеп, шартта даулардың Төрелік орталыққа берілуі туралы төрелік ескертпе бар-жоғын тексеруді ұсынамыз.